Amerikansk i tet

Før starten av mesterskapet har ein loddtrekning av kva for ein av dei 21 båtane kvart mannskap skal segla med dei ulike dagane i mesterskapet. Skal ein gå til topps må ein sjølvsagt ha eit visst klaff med både loddtrekning og det som skjer på fjorden.

Grunna vindstille sundag vart det gjennomført 3 løp på mandag og dermed var ein i rute i høve til det planlagde programmet. Det første løpet gjekk i 2-3 m/s, men så tok vinden seg opp til 5-7 m/s på dei to neste løpa. Amerikanske Jon Perkins var suveren med tre spikrar.

– Han seglar imponerande godt, fortel regattasjef Magne Sandtorv.

Tysdag var vinden nokså lett og i det fyrste løpet kunne det sjå ut til at Bergens-seglarane hadde ein heimebanefordel. I det fyrste løpet var dei tre fyrste båtane i mål alle segla av Bergens-seglarar. I det andre løpet var ting attende til det normale med Perkins og Gottfredsen på andre plass.

Verdt å merkja seg elles i dette løpet var 5 treknarrar mellom dei 8 fyrste båtane. Knarren vert nemleg segla med båtar av både plast og tre. For å halda eintypestatusen vert plastknarrane bygde med same vektfordeling og sluttvekt som treknarrane.

For amerikanske Brent Crawford enda dagen dramatisk. I pausen etter det andre løpet oppdagar mannskapet at båten er halvfull i vatn. Den fastmonterte lensepumpa er øydelagt og noko laus pumpe finst ikkje. Dermed måtte verdas beste pumpe takast i bruk: ein redd mann med bøtte… – Det heile gjekk bra, båten vart taua til lands og teken hand om, fortel Magne Sandtorv.

Dagen vart avslutta med fest på Bergens Sjøfartsmuseum.